Miscellanea (3)
Home Up Biographic Sketch Songs of the Rail Ballads & Sonnets Later Poems Main Index Site Search
 


 

 

 The Landlord's Best.

A humorous reading.


A strappin', sonsie, weel-matched pair
Were Jock Macree an' Maggie Blair,
An' mony wusses, said an' thinkit,
They had that nicht when they were linkit.
An' on that day they baith were kirkit,
The lasses sat fu' gleg an' smirkit;
Though there was that upon their faces
That fain wad swappit Maggie places.
An' Jock looked unco gran' beside
His bonnie, blushin', weel-faured bride,
Whom he had vowed to love an' cherish—
Alas!   That siccan vows should perish—
For twenty times, an' twenty mair,
When he was courtin' Maggie Blair,
He swore, without ae chance o' blinkin',
Ance Maggie his he'd stop the drinkin'.

For Jock—although I grieve to tell—
When left owre muckle to himsel',
Was jist a wee thing apt, if ony,
O' gettin' fuddled wi' a crony;
Could sing oor auld scots sangs until
The tears cam' happin' at their will.
And then the ither gill gaed roun',
Untu they felt it tak' their croun;
Then nocht wad ser' them after that
But "Willie brewed a peck o' maut,"
And Jock wad rise to lead their singin',
Till a' the hoose an' streets were ringin',
"We are na fou we're no' that fou,"
Then stagger hame to prove it true.

But a' sic wark cam' to a stan'
When he took Maggie by the han';
The whisky stoup an' dissipation
Were noo for him a puir temptation.
Nae mair at nicht, when sprees were on,
An' a' the "Blue Bell" windows shone,
Was Jock's voice heard amid the thrang
Clear ringin' in an auld scots sang,
In place o' a' sic rant and noise
He noo had calm domestic joys,
Sat wi' his pipe in lordly pride,
A monarch by his ain fireside.
An' Maggie, tidy, neat, an' braw,
The very life an' soul o' a',
Beside him knittin' unco thrang,
An' happy as the day was lang;
For she was ane that couldna sit
An idle moment, but wad knit.

Alas!   In spite o' a' love's pleadin',
Jock left his sweet domestic Eden,
For by degrees he slippit doon
To see some neebors in the toon.
Then ane wad cry—"come, Jock, what's wrang?
It's ages since I heard a sang.
Come in, come in, an' ha'e a gill—
A single glass can do nae ill;
Maggie, though she may look fu' sour,
Can surely spare ye for an hour."
Jock thocht on Maggie a' her lane,
The vows he made no' lang since gane;
Shook his rouch heid—"I've in the pin,
I canna gang," and then—gaed in.

That nicht Jock sang—"we are na fou,"
Alas!   He sang what wasna true.
An' sae it cam' that mair an' mair
The forenichts saw his empty chair;
An' Maggie, unco wae to see't,
Took mony a lang an' lanely greet,
But ne'er gied Jock a bitter word,
For a' the stories that she heard.
He still was kin', although, by token,
The vows he ance made a' were broken.
Neebors cam' in to settle matters,
An' Maggie listened to their clatters.
Said ane, "noo, Maggie, un'erstan'
It's time ye took the upper han',
Rage at him, whether late or sune,
An' cast up a' the ills he's dune;
My fegs, if I were in your place
I'd set my mark upon his face.

Let my gudeman play siccan pranks,
He kens what he wad get for thanks.
The deaf side o' his head wad hear't,
An' weel I ken for that he's fear't."
Ithers spoke oot wi' bold assertion,
An' a' to ae gran' en'—coercion.
But Maggie loot them say their say,
An', when they a' had gane away,
After anither spell o' grievin',
Sat doon, an' yokit to her weavin'.

Mony a sair, sair heart was hers
To see Jock on the road that errs;
The red upon her bonnie cheek
Grew less, although she wadna speak.
The glances o' her bonnie een
Hadna the licht that ance was seen.
O, Jock, man, look at their saft pleadin',
An' turn back to your ain sweet Eden.
In vain; Jock noo was far astray
Frae Eden an' its happy day;
Was oftener at the "Blue Bell" inn
Makin' his weekly wages spin;
Singin', as only he could do—
"We are na fou," an' gettin' fou.

A neebor, wha had seen for lang
That things wi' her had a' gane wrang,
Cam' in, an', when the twa were sittin'
(Maggie as usual wi' her knittin'),
Said, "Maggie, hear me for a wee,
But dinna tak' it ill frae me.
I ken that Jock, yer ain gudeman,
Against ye never raised a han',
But we maun mak' him stop the drinkin',
An' here's the ootcome o' my thinkin'."

Fu' lang the twa were at their crack,
An' mony a face did Maggie mak'.
"Na, na, I couldna ha'e the face
To do that: 'twad be oot o' place.
Yet I wad work wi' a' my micht
To keep Jock trig an' douce an' richt."
"Then do but this," her neebor said,
"An' I could maist lay doon my head
He'd sooner jump owre corsencon
Than look the road the "Blue Bell's" on.
The landlord will tak' up the plan,
An' try to help us a' he can.
Jist think; it's only ae half hour,
An' after that Jock's in your power—
A sober, decent man, the pride
O' you an' a' the kintra side."
Maggie thocht lang, an' deep, an' sair:
"If I thocht Jock wad drink nae mair—
I'll do't, I'll do't though a' the folk
Should speak; it's for the gude o' Jock."
"Aweel," her neebor said, "I'll pit
The landlord up to what's on fit,
An' let it be next Friday nicht,
An' gudesake see ye do it richt."

The Friday nicht cam' duly roun',
An' folk were busy in the toon,
The "Blue Bell" was as thrang's a fair,
An' Jock, ye needna doot, was there—
The gill stoup had gane roun' to settle
A' qualms an' pit him into fettle.
An' there he sat—a happy man—
A glass o' whisky in his han',
For he had just sat doon frae singin'
"We are na fou," an' a' was ringin';
When, bang!   The door gaed wi' a clash,
An' in cam' Maggie wi' a dash,
Raxed oot her han', drew in a chair,
An' richt forenent him plumpit square;
Cried, "you that's nearest touch that bell."
An', when the landlord cam' himsel',
She gied her orders wi' the rest—
"A gill, an' see it's o' your best."
The drink cam' ben: she filled her gless,
No half, but to the brim nae less,
Then, haudin't up wi' smirkin' pride,
She lookit owre at Jock an' cried—
"Here's to ye, Jock, my man, ye see
What's gude for you is gude for me,
Here's to ye"—an' wi' that she drew
The gless up to her bonnie mou',
Cocked up her finger, drank it a',
Then gied her sonsie face a thraw.
"That's gude," cried Maggie; "to my min',
When ance it's owre, it's unco fine.
Nae wunner men drink, for, my sang,
Sic glesses warm the road they gang;
I'll ha'e anither—gude be thankit,"—
Then filled a second glass an' drank it.
But Jock!   He sat upon the chair
The very picture o' despair;
His mooth fell doon, an' wide he gapit,
Though no' a single word he shapit.
The glass o' whisky in his han'
Cowpit, an' owre the table ran.
He glowred at Maggie, rubbed his een,
Then glowred again.   What could it mean?
An' was that Maggie—surely no'?
An' yet it strack him like a blow.
He sat strecht up, as though his back
Had been o' airn, but never spak'.

"I wuss," cried Maggie, "I could sing,
But gi'e that bell anither ring.
Talkin's dry wark, an'—let me see—
Half mutchkin?   Ay, bring that to me,
I'll pay my way as lang's i'm able"—
An' banged a shillin' on the table.

Then Jock rose up wi' furious speed,
His een maist startin' frae his heid,
Sprang back, an' sent the coupit chair
Wi' ae kick richt across the flair,
Then, fu' o' shame, an' rage an' doot,
Hung doon his heid and boltit oot.

For days Jock gaed aboot like ane
Whase very heid is on the spin,
While, noo an' then upon his face,
A puzzled look wad tak' its place.
Then he would stop an' scart his croon,
Hotch up his shou'der an' look roun',
Cry, as he gi'ed anither claw—
"I canna un'erstan't ava!
Three gills an' no' a preen the waur,
Far less has garred me tak' the glaur.
It cowes the gowan, an' the mair
I think the mair I rive my hair."

But aye the upshot o' his thinkin'
Was, "what if Maggie tak's to drinkin'?
Maggie sae trig an' nice an' braw,
Nae wife like her amang them a',
An' tidy?   Ye micht tak', fu' fain,
Your dinner aff the clean hearthstane.
O, Jock, o, Jock, your a' to blame,
But this ae nicht when I get hame
I'll pit my thinkin' into action,
An' wi' her try to mak' a paction."

That nicht Jock sat, an' sat fu' lang,
Till Maggie thocht some thing was wrang,
For ae half-hour he never spoke,
Nor raxed his pipe doon for a smoke,
But aye he gi'ed anither shift,
Till Maggie catched at last his drift,
An' wi' a woman's tact an' wit,
Resolved to draw him oot a bit:—
"John i'm gaun doon the toon to see
Some frien's o' mine an' crack awee;
I'll no' be lang—rax me my shoon—
An' dinna let the fire gang doon.
I maist forgot, if I should meet
Auld frien's o' yours upon the street,
And should they stop and speer at me,
I'll say ye're weel—and should I see the landlord—

Here Jock started up,
Got Maggie's twa hands in his grup—
"Maggie, sit doon an' hear me speak
What I've been thinkin' a' this week,
For god's sake let us stop this drink,
An' never mair on whisky think.
I'm ready ony time to sign
The pledge, if your name gangs wi' mine."

Then Maggie hung her heid to screen
The joy that danced within her een.
But yet half-feared owre sune to strike—
"It's hard to gi'e up what I like,
But if I thocht ye wad be true,
An' swear to a' ye've said the noo,
I micht be coaxed to answer 'yes,'
An' seal't this moment wi' a kiss."

"I swear," quo' Jock, "an' there's my han',
O, Maggie, I'm a happy man,
But if ye kenned what awfu' doots
I had since"—Maggie whispered, "hoots!
Let byganes be—they bring but grief,
For noo we've turned anither leaf,
An' there's your kiss—"

What mair was needin',
To draw Jock back again to Eden?

Lang after that, ae nicht when Jock
Was half-way through a glorious smoke,
A puzzled look spread o'er his face,
An', layin' his pipe upon the brace,
He turned to Maggie, wha was sittin'
As usual busy wi' her knittin',
An' said, "noo, Maggie, tell me richt,
Hoo did ye stan' the drink that nicht?
To me 'twad been an unco test—
Hale three gills o' the landlord's best!"

"Aweel," quo' Maggie, "I've been thinkin',
That since we baith ha'e stoppit drinkin',
I'll own't—for noo it disna matter—
It was his best, John—it was water."

 



Home | Up | Biographic Sketch | Songs of the Rail | Ballads & Sonnets | Later Poems | Main Index | Site Search
 

Correspondence should be sent to Webmaster@Gerald-Massey.org.uk